eivør

EIVØR útgávukonsert (Enn) Standikonsert - upphiting Jógvan So er Eivør aftur klár við nýggjari útgávu og útgávukonsert. 14. juni verður nýggja útgávan Enn tøk í plátubúðum og á digitalu platformunum. Útgávan verður fylgd upp við drúgvari konsertferð, ið byrjar í Føroyum 30. august. Eivør stillar upp við fulmannaðum bólki, sum er settur saman av Mattiasi Kapnas, Per Ingvaldi Højgaard Petersen og Mikael Blak. Á konsertunum fer Eivør at framføra tey átta løgini á nýggju útgávuni, ið øll eru á føroyskum, umframt onkur eldri løg, ið vit kenna. Fyrstu grundarsteinarnir til útgávuna vórðu lagdir í Tjørnuvík í 2021, har Eivør og Tróndur vóru á arbeiðslegu. Løgini á nýggju útgávuni hevur Eivør skrivað og framleitt í tøttum samstarvi við Trónd Bogason, Marjuna Syderbø Kjelnæs og í samstarvi við limirnar í bólkinum. Sjálv greiðir Eivør frá, at hetta nokk er hennara mest fjølbroytta og eksperimenterandi útgáva higartil. Hon lýsir tónleikin sum eina symfoniska rúmdar opera blandað saman við einum myrkum, elektroniskum “beat”-heimi. Fyrsta staklagið Jarðartrá er komið út saman við video framleitt av íslendinginum Einar Egils. Lurta her, og fá ein forsmakk upp á tað, tú kanst vænta tær til konsertina. Konsertin byrjar við, at Jógvan kemur at spæla nøkur løg av hansara seinastu útgávu Tøgn, ið varð útgivin í 2023. Konsertin er ein standikonsert, men nøkur sitipláss eru tó í Klingruni. Fólk við serligum tørvi kunnu seta seg í samband við Norðurlandahúsið og bíleggja sitipláss.Tey, sum hava hesi pláss, skulu venda sær til duravørðin og fáa ávíst eitt serligt pláss. Kostnaður: 365 kr. Ung 17 ár og yngri: 265 kr. (avmarkað nøgd)