deLillos

DELILLOS - AKUSTISK Eit av Norges viktigaste rockeband deLillos kjem til Trivselshagen og Glopperock for fyrste gong! Oslo-bandet deLillos starta opp allereie i 1984 fronta av Lars-Lillo Stenberg. Med ei enorm mengde hits i kofferten har verkeleg deLillos vist seg å være eit av dei fremste innan norsk rock. Med eit lett naivt tekstunivers, livlege gitarar og Lars-Lillos’ velkjende og særeigne vokal, er alt dei har gjort nærmast som kulturskattar å rekna. Og folkefavorittane «Smak av honning», «Neste sommer», «Flink», «Kokken Tor» og «Tøff i pysjamas» vil for alltid stå fjellstøtt både live og i det gode gamle albumformatet. Gruppa blir rekna som ein av dei mest markante i norsk musikkliv frå 1980-tallet og fram til i dag. Saman med Raga Rockers, DumDum Boys og Jokke & Valentinerne blir deLillos referert til som ein av dei fire store norske rockegruppene. deLillos har vunne heile tre Spelemannsprisar i si karriere og gav i 2014 ut det kritikarroste albumet «Rett og slett livet» som hamna på 1.plass på både iTunes og VG i tida etter. I 2015 feira dei 30 år som band og spelte alle sine 15 album live på 10 dagar på Popsenteret til stor suksess. I tillegg gav dei ut 4 samlealbum og boka «Glemte minner- historien om 230 deLillos-sanger». Desember 2017 kom live albumet «deLillos - Sveve over byen med Kringkastingsorkesteret» . Eit band som fortsatt helde koken med andre ord. Vi gledar oss! Fredag 24. august blir det akustisk konsert med deLillos i kultursalen i Trivselshagen, under Glopperock 2018. Denne kvelden får du ein «unplugged» hitparade frå eit av Norges største rockeband. Billettar kan også kjøpast ved Servicetorget på Søreide og i Trivselshagen sin kafè.