Frøkedal

Frøkedal har i mange år vore ei særeigen kraft i den norske musikkfloraen med fengande alternativ pop som forgreinar seg til både rock og folkemusikk. Sjølv om Frøkedal stadig held fast ved elgitaren, var det forsøket på å lære å spele fele som sette størst preg på sisteplata STAY (2024). Her grev ho i heimlege musikalske skattekister og let reinspikka popsongar smelte saumlaust saman med asymmetrisk pols-rytmikk, vals og allsong-rock. På Osafestivalen vil du sjå Frøkedal på sitt mest tradisjonsmusikk-nære, i samspel med Powerfolk-Familien: Olav Christer Rossebø (fele, mandola), Anders Hana (langeleik, gitar, munnharpe), Ingeleiv Berstad (fele, vokal) og Selma French (fele, vokal). «Dette er Anne Lise Frøkedal på sitt mest kompromissløse, og på sitt beste, mest episke, rufsete og vakreste, hvor hennes egen gitar harver seg med skarpe strenger fra rockhistorien gjenom progrocken, countyen og americanaen og inn i den britiske 90-tallssfæren hvor man mer enn aner omrisset av en PJ Harvey på sitt mest rocka.» (Dagsavisen om Old Mistakes / STAY) Frøkedal har fått varm omtale i The New Yorker og The Sunday Times, har spelt live på BBC Radio6 og mottatt to Spellemann-nominasjonar. Frøkedal & Familien har også blitt invitert til å varme opp for storleikar som A-ha, Madrugada og Teenage Fanclub.